Visayas Grid, ipaubos sa Yellow Alert karong hapon tungod sa kakuwang sa suplay sa kuryente

| By : Jomer Pequit

Ipaubos sa Yellow Alert ang Visayas Grid karong hapon, Mayo 18, gikan sa alas-4:00 sa hapon hangtod sa alas-8:00 sa gabii, sumala sa pinakabag-ong taho sa National Grid Corporation of the Philippines (NGCP). Base sa datus kaganihang alas-8:00 sa buntag, moabot sa 2,676 ka megawatts (MW) ang daling magamit nga suplay sa kuryente sa rehiyon, samtang gilauman nga mosaka ngadto sa 2,513 MW ang pinakataas nga panginahanglan o peak demand.

Nakatampo sa maong deklarasyon ang pagkapalong sa tulo ka dagkong planta sa karbon sa Visayas—ang TVI 1, TVI 2, ug PEDC 3—kauban ang taas nga banabana sa panginahanglan sa kuryente. Sa kinatibuk-an, moabot sa 852.9 MW ang nakulang sa grid tungod kay adunay 13 ka planta ang kalit nga napalong sukad niining bulana, samtang ang uban wala na mag-andar sukad pa sa miaging mga tuig (usa sukad niadtong Marso, tulo sukad sa 2025, tag-duha sukad sa 2024 ug 2023, ug usa sukad sa 2021). Gawas niini, 11 pa ka mga planta ang nagdagan karon sa mas mubu nga kapasidad kun derated capacity.

Ipapahamtang ang Yellow Alert kung ang gitagana nga reserba sa kuryente dili igo alang sa gikinahanglang contingency sa transmission grid, bisan pa man kung wala pay gilauman nga dinalian nga pagkapalong sa kuryente o rotating power outage.