Kapin sa 2,000 ka semilya sa bakhaw ug coastal trees, giandam sa gipahigayong 'C.A.R.E.S.' sa Tagbilaran

| By : Jomer Pequit

Malampusong gipahigayon sa Office of the City Administrator sa Dakbayan sa Tagbilaran, kauban ang mga attached offices niini, ang ilang 1st Semester Volunteerism Activity nga giulohan og "C.A.R.E.S." (City Administrator’s Office for Resilient Environmental Stewardship): Mangrove Bagging Activity niadtong Mayo 15, 2026. Ang maong kalihokan gihimo pinaagi sa pakig-alayon sa Catholic Relief Services ug sa Konseho sa Barangay Taloto, isip pagsuporta sa 3rd Executive Agenda ni Mayor Jane Yap nga mao ang Green Transformation.

Moabot sa kinatibuk-ang 2,095 ka mga semilya sa bakhaw ug coastal trees ang malampusong giandam ug gibutang sa bagging bags sa maong adlaw. Gilangkuban kini sa 974 ka Nypa fruticans (Nipa), 850 ka Rhizophora mucronata , 200 ka Rhizophora apiculata, 56 ka Terminalia catappa (Talisay), ug 15 ka Avicennia marina (Bungalon).

Nisalmot sa maong inisyatiba ang Tagbilaran City Environment Management Office (TCEMO), Tagbilaran City Traffic Management Office (TCTMO), City Economic Development and Investment Promotion Office (CEDIPO), ug ang Active Local Emergency Response Team (ALERT).

Pinaagi sa programang C.A.R.E.S., nagpadayon ang pagpalatid sa Office of the City Administrator sa ilang obligasyon ug tinguha alang sa pag-atiman sa kalikupan, pagpalig-on batok sa kausaban sa klima, ug ang mapuslanong kalamboan sa mga kabaybayonan sa dakbayan.