15-anyos nga Lalaki, Patay human Makurentehan sa Carmen samtang nag Charge sa Cellphone

Usa ka 15-anyos nga lalaki ang nakabsan sa kinabuhi human kini makurentehan sa Sitio Centro, Barangay El Salvador, Lungsod sa Carmen, niadtong Lunes sa hapon. Ang Biktima nailhan nga si Jhon Cloma, 15-anyos. Sumala sa report nga nakuha sa DYTR NEWS, nahitabo ang maong insidente kagahapon sa hapon samtang anaa ang biktima sa sulod sa ilang panimalay.

Daling niresponde ang mga sakop sa Carmen Disaster Risk Reduction and Management Office (DRRMO) human madawat ang alarma. Pag-abot sa mga rescuers, naghay-ad na ang biktima sa sawog hinungdan nga gitauran kini og full blast oxygen ug gipailawom sa 40 ka cycles sa Cardiopulmonary Resuscitation (CPR) isip tinguha nga maluwas pa ang iyang kinabuhi.

Bisan pa man sa gihimong dinaliang medikal nga tabang sa mga responder, naksabsan ra gihapon sa kinabuhi ang maong lalaki.

Base sa impormasyon nga nahipos sa DYTR NEWS, gituohang ang nag-saksak nga charger sa cellphone ang hinungdan sa pagkakurente sa biktima.