USA KA BARANGAY ALERT VOLUNTEER, NAKABSAN SA KINABUHI SAMTANG MITABANG  SA SUNOG  SA BRGY, MANGA, TAGBILARAN CITY

| By : Jomer Pequit

Gisugat sa kaguol ang nahitabong sunog sa Purok 5, Barangay Manga, Tagbilaran City karong gabii human makalas ang kinabuhi sa usa ka Barangay Alert volunteer nga si Wendel Nulla samtang anaa sa tunga sa operasyon.

Sa taho nga naggikan kang Fire Marshal Salva, dungan nga nadawat sa direct Fire Station hotline ug sa 911 ang tawag labot sa insidente sa eksaktong alas-8:29 sa gabii.

Dali dayon nga niresponde ang mga sakop sa Tagbilaran City Fire Station diin opisyal nga nadeklarar ang 1st Alarm sa alas-8:34 sa gabii. Kontrolado na ang kalayo pag-abot sa alas-8:42 sa gabii ug hingpit nga nadeklarar nga fire out sa alas-8:44 sa gabii.

Ikasubo nga samtang nagpadayon ang firefighting operations, na-cardiac arrest si Nulla samtang mitabang sa pagtubag sa maong emerhensya. Gidala gilayon siya pinaagi sa ambulansya ngadto sa labing duol nga tambalanan apan taud-taud, gideklarar kini nga nakabsan na sa kinabuhi.

Labihan ang pahasubo nga gipaabot ni Mayor Jane Yap ngadto sa pamilya sa mitaliwan nga volunteer, ug gipasalig nga ihatag ang tibuok nga suporta ug hinabang alang kanila, ingon man ngadto sa mga pamilyang nabiktima sa sunog.

Taliwala niini, giila usab sa lokal nga kagamhanan ang nagkalain-laing reaksyon ug mulo sa mga residente kalabot sa emergency response sa panahon sa krisis. Gipahayag nga balido ang matag kahingawa ug kini sutaon ug i-assess pag-ayo aron mas mapalambo pa ang serbisyo, tungod kay prayoridad sa siyudad ang kaluwasan sa matag Tagbilaranon.