SUNOG SA MANGA, TAGBILARAN CITY, NAGBILIN OG KASUBO HUMAN USA KA BARANGAY ALERT VOLUNTEER ANG NAKALAS

| By : Jomer Pequit

Usa ka dako nga kasubo ang nagbilin sa dakbayan human nakalasan og kinabuhi ang usa ka volunteer samtang nagpadayon ang operasyon sa pagpawong sa sunog nga miigo sa Purok 5, Magsaysay Street, Barangay Manga, niining dakbayan, kagabii. Ang biktima, giila nga si Wendell Nulla kinsa usa ka sakop sa Barangay Alert nga daling miresponde aron motabang, giingong na-Cardiac Arrest samtang anaa sa dapit sa insidente. Bisan pa man sa dinalian nga pagdala kaniya sa ospital, subo nga gideklarar kini nga wala na puy kinabuhi.

Sumala sa taho gikan ni Fire Marshal Supt. Angelie Salva, nadawat sa 911 ang tawag kalabot sa sunog alas-8:27 sa gabii, samtang nadawat usab sa direct hotline sa Tagbilaran City Fire Station ang laing report alas-8:29 sa gabii. Daling milihok ang City Disaster Risk Reduction and Management Office (CDRRMO) ug ang mga bombero sa dakbayan, diin gideklarar ang 1st Alarm alas-8:34 sa gabii. Tungod sa kaabtik sa Bureau of Fire Protection (BFP) Tagbilaran ug sa tabang sa mga mabinantayong silingan, daling nakontrolar ang kalayo alas-8:42 ug hingpit nga gideklarar nga "fire out" alas-8:44 sa gabii.

Nasayran nga ang maong sunog miigo sa "dirty kitchen" nga gipanag-iya ni Jennifer Sordilla, nga adunay gidak-on nga gibana-bana nga 20 metro kuwadrado, ug milinat og danyos gibanabana nga anaa sa ₱7,000. Tungod sa paspas nga pagresponde sa mga dedikadong firefighters, napugngan ang posibleng pagkaylap sa kalayo ngadto sa mga silingang kabalayan. Subay niini, nagpahinumdom pag-usab ang mga awtoridad sa publiko nga kanunayng susihon ang mga electrical connections, tangke sa LPG, ug mga open flames ilabi na sa dapit sa kusina aron malikayan ang susamang trahedya.

Sa laing bahin, personal nga nipahayag si Mayor Jane Yap nga ihatag sa kagamhanang lokal ang hingpit nga suporta ug hinabang alang sa pamilya sa nakalas nga Barangay Alert volunteer, ingon man sa pamilyang biktima sa sunog. Gidawat usab sa mayor ang mga kabalaka ug sentimiento sa mga residente kalabot sa emergency response sa dakbayan. Gipaniguro ni Mayor Yap nga balido ang matag mulo sa katawhan ug kini seryosong susihon ug i-assess sa kagamhanan, dungan sa pagpasiatab nga ang kaluwasan sa matag Tagbilaranon mao kanunay ang nag-unang prayoridad sa iyang administrasyon.