PHP 174K NGA BALOR SA SHABU SAKMIT SA BUY-BUST OPERATION SA TAGBILARAN; 2 KA SUSPIK SIKOP

| Jomer Pequit 

Nagtingkagol na karon sa bilanggoan ang duha ka indibidwal human nasikop sa gipahigayon nga anti-illegal drugs operation sa Purok 5, Barangay Tiptip, Dakbayan sa Tagbilaran, niadtong Mayo 19, 2026, sa may alas 11:18 sa gabii.

Ang malampusong operasyon gipasiugdahan sa mga personahe sa City Drug Enforcement Team (CDET) sa Tagbilaran City Police Station, ubos sa pamunuan ni PLT Greg L. Reyes ug sa direktang superbisyon ni PLTCOL Joey Malarre Bicoy, OIC-TCPS, uban sa koordinasyon sa RID7/RPDEU7 ug PDEA.

Atol sa maong buy-bust, nasakmit gikan sa mga dinakpan ang unom ka heat-sealed transparent plastic sachets nga adunay sulod nga puting kristal nga substansiya nga gituohang shabu.

Ang maong drugas mitimbang og 25.6 gramos nga adunay banabana nga Standard Drug Price (SDP) nga mokabat sa Php 174,080.00. Sa pagkakaron, ang mga suspetsado anaa na sa kustodiya sa Tagbilaran City Police Station alang sa saktong disposisyon ug sa pagpasang-at sa tukmang mga kaso ubos sa RA 9165 o ang Comprehensive Dangerous Drugs Act of 2002.

Subay sa Data Privacy Act, ang mga pangalan sa suspek, gikuptan sa kapulisan.