25, 180 ka Estudyante Naka Enroll sa Tagbilaran; Nagpadayon pa ang Enrollment sa DepEd

by DAVE RESPONTE

Miabot sa 25,180 ka estudyante ang natala nga enrollees sa Tagbilaran City alang sa Academic Year 2026–2027, nga 85.62 porsyento sa 29,409 ka estudyante nga na-enrol sa miaging tuig.

Gipresentar ni Acting Vice Mayor Engr. Jose Floro B. Ringca, chairman sa Committee on Education, ang enrollment report atol sa regular nga sesyon sa Sangguniang Panlungsod niadtong Hunyo 16.

Base sa datos sa Department of Education (DepEd), mikunhod og 434 ka estudyante ang enrollment sa public elementary schools gikan sa 9,662 ngadto sa 9,228, apan nagpabiling adunay 95.51 porsyento nga retention rate. Sa public secondary schools, mikunhod usab ang enrollment gikan sa 9,269 ngadto sa 8,866 ka estudyante, o 95.12 porsyento nga retention rate.

Nagpabiling adunay kinadak-ang populasyon sa estudyante ang Dr. Cecilio Putong National High School (Bohol National High School) nga adunay 4,289 ka enrollees bisan og mikunhod kini gikan sa 4,794 sa miaging tuig.

Sa private schools, ang Cebu Sacred Heart College Inc. maoy adunay labing taas nga pagtubo sa enrollment uban sa 316 ka estudyante gikan sa 253 niaging tuig, o 124.90 porsyento nga retention rate.

Samtang, ang Bohol Wisdom School, GreatMinds Leadership Academy ug PMI Colleges Inc. adunay provisional nga zero enrollment tungod kay wala pa makasumite sa ilang opisyal nga report ngadto sa DepEd division office.

Sa Alternative Learning System (ALS), 260 pa lamang ka learners ang natala, katumbas sa 43.48 porsyento sa 598 ka enrollees sa miaging tuig. Matud sa mga opisyal sa edukasyon, nagpadayon pa ang enrollment sa ALS ug gilauman nga mosaka pa kini sa mosunod nga mga semana.

Gipasabot sa DepEd nga provisional pa ang kasamtangang datos ug mahimo pang mausab samtang naghulat pa sa mga report gikan sa ubang private schools ug dugang nga ALS enrollees.

Nagpahayag si Acting City Vice-Mayor Ringca edukasyon nga gilauman nilang mas moduol sa naandan nga lebel ang kinatibuk-ang enrollment sa dihang makompleto na ang tanang submission sa mga eskwelahan ug learning centers.