Mga Board Members sa Bohol Nanawagan og Imbestigasyon sa Loboc River Project

by DAVE RESPONTE

Nanawagan sila Board Member Atty. Jiselle Rae Aumentado Villamor ug Board Member Lucille Lagunay og imbestigasyon ug mas dakong transparency sa nagpadayon nga River Protection Project sa Department of Public Works and Highways (DPWH) sa Loboc River tungod sa kabalaka sa posibleng epekto niini sa kalikupan, turismo ug panginabuhian.

Atol sa regular nga sesyon sa Sangguniang Panlalawigan nga gipangunahan ni Acting Vice Governor Tita Baja, gipasiugda sa duha ka board member nga dili sila supak sa flood control ug disaster risk reduction projects, apan kinahanglan nga masiguro ang pagpanalipod sa kalikupan ug partisipasyon sa mga apektadong komunidad.

Gibutyag ni Villamor nga nakadawat siya og mga reklamo gikan sa Bohol Provincial Tourism Office, Loboc Association of Hospitality and Accommodation (LAHA) ug Loboc People’s Council (LPC), samtang si Lagunay mipadayag nga daghang tourism operators ug mga residente ang nabalaka sa proyekto.

Lakip sa mga gipasangil nga epekto mao ang pagtangtang sa mga nipa ug natural nga bahin sa daplin sa suba, hulga sa firefly habitats ug biodiversity, pagbag-o sa natural nga dagway sa Loboc River, ug posibleng kadaot sa turismo ug panginabuhian sa mga lumulupyo.

Tungod niini, nanawagan sila sa DPWH, DENR, Bohol Provincial Environment Management Office (BPEMO) ug LGU-Loboc nga ipagawas sa publiko ang mga plano sa proyekto, environmental assessments ug compliance reports.

Gihangyo usab nila ang pagpahigayon og committee hearing, joint inspection ug komprehensibong pagrepaso sa pagsunod sa proyekto sa mga balaod sa kalikupan. Gihangyo usab ni Lagunay ang DENR nga susihon ang mga taho sa pagputol og nipa sa mga barangay Riverside, Valladolid, Poblacion Ondol, Ugpong ug Villaflor.

Giduso ang isyu sa duha ka Board Membersbngadto sa Committees on Environment ug Public Works and Highways alang sa dugang nga imbestigasyon.

Matud sa mga magbabalaod, ang pagpanalipod sa Loboc River mahinungdanon dili lamang alang sa kalikupan kondili usab sa turismo, kultura ug panginabuhian sa mga Boholano.