Tutor Nihatag og Reaksyon sa Pagpa imbestiga sa Loboc River Project

Gipadayag ni 3rd District Representative Alexie B. Tutor nga angayang mapatawag ang Department of Public Works and Highways (DPWH) Region 7 aron matubag ang mga kabalaka nga gipadayag sa mga asosasyon ug sektor nga naapektuhan sa nagpadayon nga proyekto sa Loboc River.

Matud ni Tutor, padayon niyang gisubay ang kahimtang sa proyekto ug sumala sa report sa DPWH, nagpadayon gihapon ang implementasyon niini. “Mas maayo nga mapatawag ang DPWH-7 Regional Office kabahin sa mga concern sa association.

Padayon sab nako nga gi-follow up ang status niini nga proyekto ug base sa ilang report, on-going kini,” matud ni Tutor.

Gipasiugda usab niya nga kon adunay mga epekto sa kalikopan nga wala matagad o nasulbad samtang nagpadayon ang proyekto, kinahanglan kining hisgutan dayon aron matagaan og tukmang ug madaliang aksyon sa mga hingtungdan nga ahensya.

Dugang pa niya, importante nga adunay bukas nga diskusyon tali sa mga ahensya sa gobyerno ug mga apektadong sektor aron masiguro nga matimbang pag-ayo ang mga isyu nga may kalabotan sa kalikopan, turismo ug panginabuhian sa komunidad. Sayo niini, si BM Jiselle Rae Villamor ug Lucille Lagunay ang nanawagan og imbestigasyon aa Loboc River Project tungod sa kabalaka sa kalikopan, torismo ug panginabuhian.