TUTOR MIAWHAG KANG MARCOS JR. NGA UNAHON ANG CHOCOLATE HILLS, DISASTER PREPAREDNESS UG PRC RENEWAL REFORMS SA SONA

by DAVE RESPONTE

Giawhag ni Bohol 3rd District Rep. Kristine Alexie Tutor si Presidente Ferdinand Marcos Jr. nga unahon sa iyang 2026 State of the Nation Address (SONA) ang pagpalig-on sa pagpanalipod sa Chocolate Hills, pagpangandam sa mga lokal nga panggamhanan batok sa kalamidad, ug pagpasayon sa renewal sa Professional Regulation Commission (PRC) ID.

Gihangyo ni Tutor ang Malacañang nga suportahan ang pagpasa sa House Bill No. 831 o Chocolate Hills Geological Monument Act, nga nagtumong sa pagpalig-on sa pagpanalipod sa Chocolate Hills samtang gitagad usab ang mga isyu sa mga tag-iya sa yuta, komunidad, panginabuhian, ug responsableng kalamboan sulod sa protected area. Gihangyo usab niya nga maapil ang pondo alang sa implementasyon niini sa gisugyot nga 2027 national budget.

Giduso usab sa kongresista ang pagpasa sa House Bill No. 833 o Disasters and Emergencies Management Act, ug gihangyo ang Presidente nga sertipikahan kini isip urgent aron mapalig-on ang kaandam ug kapasidad sa mga local government units sa pagtubag sa mga kalamidad.

Gisuportahan usab ni Tutor ang House Bill No. 8876, nga nagtumong sa pagpalugway sa balido sa PRC ID gikan sa tulo ka tuig ngadto sa lima ka tuig aron maminusan ang gasto, transaksyon, ug kahasol sa milyon ka mga lisensyadong propesyonal.

Matod ni Tutor, ang tulo ka mga giproponer nga balaod nagtumong sa pagpanalipod sa nasudnong bahandi, pagpalig-on sa disaster preparedness, ug pagpasayon sa mga serbisyo sa gobyerno alang sa mga Pilipino. Naglaom usab siya nga maprioridad kini sa administrasyon ni Marcos sa umaabot nga SONA.