MAYOR JANE YAP MIPIRMA NA SA ₱15 TRICYCLE FARE ORDINANCE; EPEKTIBO GILAOMAN SA HULYO 27

by DAVE RESPONTE

Gipirmahan na ni Tagbilaran Mayor Jane Yap niadtong Biyernes, Hulyo 17, ang ordinansa nga nagpaubos sa minimum nga plete sa tricycle sa Tagbilaran City gikan sa ₱20 ngadto sa ₱15, apan gibalhin ang target nga implementasyon sa Hulyo 27 human malangan ang publication sa maong ordinansa.

Gikompirma kini ni City Councilor Leonides "Edi" Borja, chairman sa Sangguniang Panlungsod Committee on Public Utilities ug awtor sa ordinansa.

Matod ni Borja, wala maapil sa publication sa mantalaang mogawas kagahapon, Domingo ang ordinansa tungod kay naabtan kini sa printing cut-off sa dihang giduso sa Office of the Sangguniang Panlungsod Secretary ang maong dokumento alang sa publikasyon.

Tungod niini, dili na madayon ang orihinal nga target nga implementasyon sa Hulyo 20. Gilaoman nga epektibo ang bag-ong pletehan sa Hulyo 27, kon mahuman na ang publication ug uban pang gikinahanglang legal nga proseso.

Ubos sa ordinansa, ang minimum nga plete sa regular nga pasahero mahimong ₱15 uban sa ₱3 matag mosunod nga kilometro, samtang ₱12 ang minimum nga plete alang sa senior citizens, estudyante ug PWDs uban sa ₱2.40 matag mosunod nga kilometro.

Hangtod dili pa makumpleto ang tanang legal nga rekisitos, magpadayon sa pagkakaron ang ₱20 minimum nga plete sa tricycle sa Tagbilaran City.