TAGBILARAN NAGPALIG-ON SA DISASTER RESPONSE PINAAGI SA OCD UG TARSIER 117 ICS EXECUTIVE COURSE

by DAVE RESPONTE

Gipalig-on sa Tagbilaran City Government ang disaster response capability sa siyudad pinaagi sa Incident Command System (ICS) Executive Course nga gipahigayon sa Office of Civil Defense (OCD) ug TaRSIER 117, isip kabahin sa padayon nga pagpangandam batok sa mga kalamidad ug uban pang emerhensiya.

Ang pagbansay, nga gihimo niadtong Hulyo 17 sa JJ's Seafood Village, gitambongan sa mga miyembro sa City Disaster Risk Reduction and Management Council (CDRRMC), CDRRMO Gerard Lavadia, mga opisyal sa lokal nga panggamhanan, ug mga emergency response stakeholders, lakip si City Councilor Fausto “Bebot” Budlong, chairperson sa Committee on Peace, Order and Public Safety sa Sangguniang Panlungsod.

Gipangulohan ang training nila Dennis Atto, hepe sa Capacity-Building and Training Section sa OCD, ug Darwin Bernasor, Head of Emergency Communications sa TaRSIER 117.

Atol sa maong executive course, gipasiugda ang Incident Command System (ICS) isip nasudnong sistema sa pagdumala sa mga kalamidad ug dagkong insidente ubos sa Republic Act No. 10121, lakip ang incident command, inter-agency coordination, ug episyenteng paggamit sa mga kahinguhaan panahon sa emerhensiya.

Matod ni Councilor Budlong, ang pagbansay kabahin sa padayon nga paningkamot sa administrasyon ni Mayor Jane Yap aron mapalig-on ang koordinasyon, liderato, ug decision-making sa mga ahensya sa siyudad, nga makatabang sa mas organisado, paspas, ug epektibong pagtubag sa mga emerhensiya ug kalamidad.