DAKO NGA PAGSAKA SA PRESYO SA DIESEL UG GASOLINA GILAOMAN KARON MARTES; APEKTADO ANG MGA MOTORISTA SA BOHOL

by DAVE RESPONTE

Gilaoman ang dakong pagsaka sa presyo sa produktong petrolyo karong Martes, Hulyo 21, diin ang diesel posibleng mosaka og ₱9.50 hangtod ₱11.00 matag litro, samtang ang gasolina gilaumang mosaka og ₱3.50 hangtod ₱4.50 matag litro.

Base sa industry projections, kini mahimong usa sa labing dakong oil price increase sulod ning tuiga ug gilaumang makaapekto sa liboan ka motorista sa Bohol, lakip ang mga drayber sa jeepney, traysikol, bus, delivery vehicles, mga mangingisda, ug mga negosyo nga nagsalig sa produktong petrolyo.

Gilaoman nga ipahibalo sa mga oil company ang pinal nga price adjustment sa dili pa kini ipatuman karong Martes. Lakip sa mga kompanyang adunay mga estasyon sa Bohol nga magpatuman sa bag-ong presyo ang Shell, Petron, Caltex, Seaoil, ug Cleanfuel.

Ang gilaomang pagsaka sa presyo gimugna sa kabalaka sa posibleng kakulang sa suplay sa krudo tungod sa nagkagrabeng tensiyon tali sa Estados Unidos ug Iran sa Middle East. Ang kahadlok sa posibleng pagkabalda sa global oil supply maoy nagtukmod sa pagsaka sa presyo sa lana sa kalibotan.