SANDUGO AGRI FAIR NAKAREKORD OG ₱2.8M NGA HALIN; VALENCIA, CALAPE UG MARIBOJOC NANGUNA SA MGA PATIGAYON

by DAVE RESPONTE

Nakarekord og ₱2.8 milyon nga halin ang Sandugo sa Bohol Agri Fair 2026 sulod sa lima ka adlaw gikan Hulyo 13 hangtod 17, mas taas kaysa ₱2.2 milyon niadtong 2025, samtang padayon nga gipalapdan sa Provincial Government of Bohol ang merkado alang sa mga mag-uuma, mangingisda, ug agri-entrepreneurs.

Mikabat sa 10 ka metriko tonelada sa mga produktong agrikultural ang mabaligya matag adlaw. Misaka usab ang partisipasyon ngadto sa 30 ka LGUs, gikan sa 27 sa miaging tuig, samtang ang pribadong exhibitors misaka gikan sa 19 ngadto sa 23.

Gipahibalo usab ni Governor Aris Aumentado ang dugang ₱5 milyon alang sa agricultural buy-back program aron mapalambo ang merkado ug masiguro ang lig-on nga kita sa mga mag-uuma ug mangingisda.

Sa Best Booth and Product Display, nagkampyon ang Valencia, gisundan sa Sagbayan ug Carmen. Sa Most Promising Processed Product, nag-una ang Calape, gisundan sa Valencia ug Bien Unido sa Seaweed Category; samtang Maribojoc ang kampyon sa Tilapia Category, gisundan sa Carmen ug Clarin.

Sa Pinaka Contest, midaog ang Cortes (Puto Balanghoy), Clarin (Bingka), ug Lila (Dumog) sa Processed Product Category. Sa Fishery Category, nag-una ang Getafe (Alimango), Carmen (Tilapia), ug Sagbayan (Hito).

Sa Indigenous Root Crop Category, gipasidunggan ang Calape (Gabi), Alburquerque (Cassava Blanch ug Kot), Batuan (Kolo), Valencia (Paw ug Bot), ug Antequera (Apali).

Sa Indigenous Fruit Category, mga mananaog ang Trinidad (Cacao Pod), Duero (Ripe Jackfruit), Calape (Banana Lakatan), Bilar (Young Sweet Corn), ug Sikatuna (Buko).

Sa Indigenous Vegetable Category, nagdaog ang Valencia (Upo ug Talong), Clarin (Kalabasa), ug Trinidad (Ampalaya).

Ang Agri Fair 2026 kabahin sa mas dako nga selebrasyon sa Sandugo sa Bohol, nga nagtumong sa pagpalig-on sa merkado sa lokal nga mga produkto ug paghatag og malungtarong panginabuhian alang sa mga mag-uuma, mangingisda, ug sa sektor sa agrikultura.