KAPITOLYO NAGPALIG-ON SA GI PROTECTION SA UBI KINAMPAY ARON MAPANALIPDAN ANG EKSKLUSIBONG PAGKAILA SA BOHOL

by DAVE RESPONTE

Gipalig-on sa Provincial Government of Bohol ang paningkamot sa pagkuha og Geographical Indication (GI) Protection alang sa Ubi Kinampay, usa ka legal nga proteksyon nga nagtumong sa pagpanalipod sa orihinal nga pagkaila sa produkto batok sa pagsundog ug sa pagpalig-on sa bili niini sa lokal ug internasyonal nga merkado.
Padayon pang gisusi sa Intellectual Property Office of the Philippines (IPOPHL) ang aplikasyon sa Bohol, samtang gilaoman nga isumite ang dugang nga dokumentasyon sa katapusan sa Agosto.

Matod ni BEDIPO Economist I Roy Geolagon, ang GI Protection mopamatuod nga ang Ubi Kinampay tinuod nga produkto sa Bohol ug mopugong sa sayop nga paggamit sa ngalan niini.

Iyang giingon nga ang kasaysayan, panukiduki, ug kultura nagpakita nga ang Ubi Kinampay naggikan sa Bohol ug nailhan tungod sa talagsaong humot nga lahi sa ubang klase sa ubi.

Nagpabiling nanguna ang Probinsya sa Bohol sa produksiyon sa ubi sa nasud, nga adunay 466 ka metriko tonelada nga abot matag tuig o 33 porsiyento sa kinatibuk-ang produksiyon sa Pilipinas.

Ang pagkuha sa GI Protection kabahin sa ilang estratehiya sa pagpanalipod sa agrikultural nga kabilin sa Bohol, pagpataas sa kita sa mga mag-uuma, ug pagpalig-on sa Ubi Kinampay isip premium nga produkto nga eksklusibong mailhan nga gikan sa Bohol.