“AKASYA NATUMBA, MOTORISTA NA-ANGHELAN”

Motorista, swerteng nakalingkawas human matumba ang usa ka akasya sa Loay

LOAY, BOHOL — Usa ka motorista ang swerteng wala maigo ug nakalingkawas sa disgrasya human kalit nga natumba ang usa ka punoan sa akasya sa Barangay Agape, lungsod sa Loay pasado alas 6:20 sa gabii, Oktubre 16, 2026.

Sa usa ka pakighinabi sa DYTR News, giasoy sa motoristang si Maricel Arbuyes ang makuyaw niyang kasinatian. Sumala pa niya, naghinay-hinay siya og padagan sa iyang motorsiklo paubos nga bahin duol sa Calbaryo, Loay dihang nakabantay siya og usa ka Ceres bus nga nagsunod kaniya. Nipadaplin siya aron paunahon og overtake ang maong bus tungod gyud sa nahimutangan sa maong akasya.

Pipila lang ka segundo human maka-overtake ang bus, nakurat na lamang si Arbuyes dihang nakadungog siya og kusog nga hagunos gikan sa iyang luyo. Paglingi niya, nakita na lamang niya nga natumba na ang dako nga punoan sa akasya. Dako ang iyang pasalamat nga luwas siya ug maayo na lang usab nga walay laing sakyanan nga nagsunod kaniya niadtong tungora.

Nakamugna og kahuot sa trapiko ang maong insidente sulod sa pipila ka minuto human mibabag ang kahoy sa kalsada. Hinuon, dali nga nakaresponde sa lugar ang mga opisyales sa Barangay Agape pinangulohan ni Noel Imboy aron daling mahawan ang kalsada ug mapasig-uli ang normal nga dagan sa trapiko.