FAKE ANTI-RABIES VACCINE?

Tagbilaran City Mayor Jane Yap, mimando og lapad nga inspeksyon batok sa peke nga anti-rabies vaccine

by JOMER PEQUIT

​Gimandoan ni Tagbilaran City Mayor Jane Yap ang City Health Office (CHO) sa pagpahigayon og dinalian ug subsob nga inspeksyon sa tanang botika sa dakbayan sugod karong Lunes, Marso 30, human nigawas ang mga report bahin sa pagpamaligya og mga peke nga anti-rabies vaccine sa nagkadaiyang parte sa nasod, lakip na sa Bohol.

Kini nga lakang subay sa taho gikan sa GMA Public Affairs ug mga mulo gikan sa mga mabalak-ong lungsoranon bahin sa seguridad sa mga tambal nga gipang-apod-apod sa pipila ka mga pharmacies.

​Giklaro sa mayor nga luwas ug kasaligan ang mga bakuna nga anaa sa Tagbilaran City Health Office ug wala kini maapil sa maong kontrobersiya tungod sa hugot nga regulasyon sa kagamhanan.

Tumong sa maong mando ang pag-imbestigar, pag-inspeksyon, ug ang dinalian nga pagbawi o immediate recall sa bisan unsang kadudahang bakuna nga posibleng nakasulod sa mga pribadong botika aron mapanalipdan ang kinabuhi sa mga Bol-anon nga anaa sa dakbayan.

​Pangunahan ni City Health Head Dr. Jeia Pondoc ug City Administrator Alvin Acuzar ang inspection team, kaabag ang Food and Drug Administration (FDA), Department of Health (DOH), Philippine National Police (PNP), ug National Bureau of Investigation (NBI).

Nagbahad ang kagamhanang lokal nga walay pasaylo ang mga abusadong negosyante nga nagbutang sa peligro sa panglawas sa publiko, samtang nanawagan usab sila sa katawhan nga i-report dayon sa CHO ang bisan unsang kadudahang transaksyon o kasayuran bahin niini.

Nimando na usab si Mayor Jane Yap ngadto sa tanang Pharmacy sa Dakbayan nga boluntaryong isurender ang mga Fake ug Unregistered nga mga Anti-rabies vaccine nga anaa sa ilang mga stockroom.