SOBRA 11,000 KA TAWO NAKASULOD NA SA TRABAHO : BEPO-PESO

by JOMER PEQUIT
​
Mas gipakusgan pa sa Kagamhanang Panlalawigan sa Bohol ang mga programa alang sa panarbaho, diin nakatala kini og kapin sa 11,000 ka mga Boholano nga malampusong nakasulod sa nagkalain-laing trabaho base sa pinakaulahing report sa probinsya.

​Atol sa flag ceremony niadtong Abril 6, 2026, didto sa New Provincial Capitol, gipasigarbo sa Bohol Employment and Placement Office–Public Employment Service Office (BEPO-PESO) ang ilang mga kalamposan ubos sa pagdumala ni Gobernador Aris Aumentado.

Matod ni Maria Vilma Yorong, ang ulo sa BEPO-PESO, ang matag placement nagpasabot og mas hamugaway nga kinabuhi ug kalig-on alang sa mga pamilyang Boholano.

​Sa kinatibuk-ang 18,658 ka mga aplikante nga narehistro ug napaubos sa ebalwasyon, moabot sa 11,014 ang opisyal nga na-hire. Lakip niini ang 461 ka mga trabahante nga napaingon sa gawas sa nasod. Gawas sa inadlaw-adlaw nga operasyon, nakapahigayon usab ang opisina og lima ka mga job fair diin 165 ka mga aplikante ang "hired on the spot."

​Aron mas mapaduol ang serbisyo sa katawhan, 33 ka mga Special Recruitment Activities ang gihimo diin ang pipila ka mga langyaw nga amo mismo ang nianhi sa Bohol aron mo-interview. Kini usa ka pamaagi aron maminusan ang gasto sa mga aplikante nga dili na kinahanglang mobiyahe og layo.

​Gawas sa aktwal nga pagpang-hire, gitutokan usab sa BEPO-PESO ang pag-andam sa mga batan-on pinaagi sa Career Guidance ug Pre-Employment Orientation Seminars (PEOS). Gatusan ka mga tinun-an gikan sa Grade 10, Grade 12, ug mga graduating college students ang napaubos sa maong mga oryentasyon aron masiguro nga andam sila sa kalibutan sa panarbaho human sa ilang gradwasyon.

​Dako usab og tabang ang pagtukod sa mga field office sa Overseas Workers Welfare Administration (OWWA) ug Department of Migrant Workers (DMW) diha sa Old Capitol Building.

Tungod niini, ang mga Overseas Filipino Workers (OFWs) sa Bohol dili na kinahanglang motabok pa sa Sugbo para lang mag-proseso sa ilang mga dokumento.

​Kini nga mga inisyatiba kabahin sa Strategic Governance Roadmap sa probinsya ubos sa pamunoan ni Governor Erico Aris Aumentado nga nagtinguha sa pagpataas sa kalidad sa kinabuhi sa mga Bol-anon dungan sa pag-ila sa Bohol isip usa ka UNESCO Global Geopark.