PNP Bohol Nakasakmit og P486K nga Droga; 27 ka Suspek tiklo sa Usa ka Semana nga Operasyon

By : Jomer Pequit, DyTR News

Mikabat sa kapin sa tunga sa milyon ka pesos nga kantidad sa ilegal nga drugas ang nasakmit samtang 27 ka mga indibidwal ang natingkagol sa bilanggoan human sa sunod-sunod nga operasyon nga gipahigayon sa Bohol Police Provincial Office (BPPO) sulod lamang sa usa ka semana.

Ubos sa pagdumala ni Police Colonel Patricio C. Degay Jr., ang probinsyal nga kapulisan mipakita sa ilang agresibong kampanya batok sa tanang matang sa kriminalidad sa tibuok lalawigan.

Sa natad sa kampanya batok sa ilegal nga droga, nakapahigayon ang BPPO og 14 ka koordinadong operasyon nga miresulta sa pagkasakmit sa 71.48 gramo sa gituohang shabu nga mobalor og ₱486,064.60.

17 ka mga personalidad, nga naglakip sa mga street-level pushers ug high-value individuals, ang malampusong nadakpan sa maong mga buy-bust operations.

Gawas sa drugas, gipakusgan usab sa PNP BOHOL ang kampanya batok sa mga loose firearms o ilegal nga armas aron malikayan ang mga bayolenteng krimen. Sa siyam ka operasyon nga gihimo, siyam usab ka mga armas ang nakompiska sa mga awtoridad diin duha ka tawo ang nasikop ug gipasakahan na og tukmang kaso. Samtang sa paggukod sa mga pinangita sa balaod, upat ka mga wanted persons ang nadakpan, lakip na ang usa nga giila nga "Most Wanted Person" sa probinsya.

Sa laing bahin, upat usab ka mga indibidwal ang nasikop sa upat ka managlahing operasyon batok sa ilegal nga sugal diin nakuha ang pusta nga mobalor og ₱505.00.

Sumala sa BPPO, kining maong mga kalampusan nagsilbing lig-on nga testimonya sa dedikasyon sa tibuok puwersa sa PNP Bohol ubos sa temang “Bagong PNP para sa Bagong Pilipinas: Serbisyong Mabilis, Tapat, at Nararamdaman,” dungan sa tinguha nga maseguro ang malungtarong kalinaw ug seguridad sa tibuok Bohol.