Balay sa Clarin naugdaw sa sunog; danyos moabot sa kapin P2 milyones suma sa BFP

By | Jomer Pequit, DyTR News
​
Hingpit nga naugdaw ang duha ka andana nga balay human kini lamoya sa kalayo kagahapon sa hapon, adlawng Lunes, Abril 13, sa Sitio Tanyong, Brgy. Poblacion Centro, niining lungsod. Sumala sa report sa BFP, ang sunog nagsugod pasado alas 2:39 sa udto diin daling miulbo ang kalayo sa maong panimalay nga gipanag-iya ni Meleton Patac.

​Sa gihimong pakighinabi sa DYTR News kang SFO2 Raymon Remoreras, ang imbestigador sa BFP Clarin, iyang gibutyag nga posibleng nagsugod ang kalayo sa ikaduhang andana sa balay. Nasayran sa inisyal nga imbestigasyon nga wala dayon makamatikod ang mga residente sa sulod tungod kay didto sila nangatog sa unang andana (1st floor). Ang mga silingan na lamang ang daling nisinggit ug nipahibalo human makit-i nga dako na ang siga sa ibabawng bahin sa balay.

​Tungod sa kakusog sa kayo, giisa ang sunog ngadto sa 2nd alarm diin ningsalmot na sa pagtabang ang mga sakop sa BFP Tubigon aron dili na mokatap pa ang kalayo sa ubang estruktura.

Human sa kapin duha ka oras nga pakigbatok sa kalayo, opisyal nga nadeklarar nga "fire out" ang insidente alas 4:14 na sa hapon.

Gideklarar nga totally damaged ang ilang panimalay nga hinimo sa semi-concrete nga materyales. Gibanabana sa Bureau of Fire Protection (BFP) nga moabot sa kapin P2 milyones ang danyos sa maong sunog.

Pipila na lang ka mga kagamitan sama sa telebisyon, speaker, ug mga hinayhay nga bisti ang naluwas sa mga tag-iya.

​Sa pagkakaron, nagpadayon pa ang lawom nga imbestigasyon sa kabumbirohan aron matino ang tinuod nga hinungdan sa sunog