Lawas sa 18-anyos nga gipatay sa uyoan sa Panglao, nadala na sa Misamis Occidental

| By : Jomer Pequit

Nadala ug nahiuli na sa iyang yutang natawhan sa Plaridel, Misamis Occidental ang patay nga lawas sa 18-anyos nga si Jerose Lood, kinsa brutal nga gipatay sa iyang kaugalingong uyoan didto sa lungsod sa Panglao. Ang patay nga lawas sa biktima gisakay sa barko gikan sa Bohol padulong sa Plaridel, diin anaa na kini karon gihaya sa ilang panimalay aron mahatagan sa desenteng haya sa iyang pamilya.

Kahinumdoman nga unang nareport nga missing si Jerose niadtong Mayo 5, apan human sa tulo ka adlaw nga pagpangita, napalgan na lang kini nga wala nay kinabuhi niadtong Mayo 8, 2026, sa may alas 6 sa hapon. Nakadiskubre ang lawas sa biktima didto sa Sitio Talisay, Brgy. Doljo, Panglao, diin duna kini samad dinunggaban sa iyang dughan nga maoy hinungdan sa iyang hinanaling kamatayon.

Giila ang suspek sa maong ngilngig nga krimen nga mao ang iyang kaugalingong uyoan nga si Elmo Lood. Sa kasamtangan, gipagawas una sa temporaryong kustodiya sa kapulisan ang suspek samtang gihuwat pa ang paggawas sa warrant of arrest gikan sa korte aron hingpit ug legal kini nga masikop ug pasakaan og pormal nga kaso.