Dugang mga classroom, gipang-inspeksyon ug gitunol sa Unang Distrito sa Bohol

| By : Jomer Pequit

Gipahigayon ang sunod-sunod nga inspeksyon ug pag-turnover sa mga bag-ong classroom ug kahimanan sa tunghaan sa Unang Distrito sa Bohol aron matubag ang kakuwang sa imprastraktura sa edukasyon sa maong dapit.

Gipangulohan ni Kongresista Baba Yap, kauban silang Department of Education (DepEd) Undersecretary Malcom Garma ug Undersecretary Peter Irving Corvera, ang pag-inspeksyon sa Lourdes National High School. Kuyog usab sa maong kalihokan silang Panglao Mayor Boy Arcay, Kapitan Eva Usaraga Lorete, mga opisyal sa DepEd, ug mga pangulo sa tunghaan aron pangitaan og solusyon ang kakuwang sa classrooms nga niresulta na sa pagpatuman og double shifting kun tungaon nga iskedyul sa klase para sa mga tinun-an. Sa maong higayon, pormal usab nga gitunol ang mga bag-ong lingkuranan ug lamisa alang sa eskwelahan.

Sa laing bahin, gipahigayon usab ang pag-ribbon cutting ug blessing sa mga bag-ong edipisyo sa Taloto Elementary School. Gilangkuban ang maong proyekto sa usa ka three-storey building nga adunay unom ka classrooms, ug usa ka one-storey building nga adunay duha ka classrooms. Mitambong sa seremonyas silang Mayor Jane Yap, mga konsehal sa dakbayan, District Engineer John Gascon, mga opisyal sa barangay, ug mga magtutudlo.

Matod ni Kongresista Yap, padayon nga hatagan og prayoridad ang pagpaayo sa mga klasrom ug ang paghatag og de-kalidad nga edukasyon pinaagi sa pakig-alayon sa Department of Education nga anaa karon sa pagdumala ni Kalihim Sonny Angara.