SERBISYO SA LTO-TUBIGON GIPADAK-AN UG GI-UPGRADE; PAG-PRINT SA PLASTIC LICENSE UG PAGRELEASE SA PLATE NUMBER PUWEDE NA!

| By : Jomer Pequit

Gipahibalo ni Kongresista John Geesnell “Baba” Yap nga mas gipalapdan ug gi-upgrade na ang mga serbisyo sa buhatan sa Land Transportation Office (LTO) sa lungsod sa Tubigon. Kini nga kalamboan gitunol aron mas mapadali, mapaduol, ug makadaginot sa oras ug gasto ang mga motorista ug lungsoranon sa maong lungsod ug sa mga silingang dapit, diin dili na nila kinahanglan pang mobiyahe og layo alang sa ilang mga transaksiyon sa lisensya ug sakyanan.

Ubos sa mga bag-ong serbisyo sa LTO-Tubigon, puwede na karon nga magproseso sa New Driver’s License, mag-renew sa Motor Vehicle registration, ug magkuha og Student Permit. Gawas niini, ang mga drayber puwede na silang magpa-print sa ilang plastic driver’s license, mabag-o man kini nga aplikasyon o renewal, aron makuha dayon ang pormal nga ID.

Dugang pa niini, abli ug anaa na usab sa maong buhatan ang pag-release sa mga dugay nang gipaabot nga plate numbers para sa mga sakyanan nga narehistro gikan sa tuig 2017 paubos. Gipahinumdoman ni Kongresista Yap ang mga tag-iya sa sakyanan nga dad-on lamang ang ilang Official Receipt (OR) ug Certificate of Registration (CR) aron daling makuha ang ilang mga plaka. Kining maong inisyatiba kabahin sa padayong tinguha sa iyang buhatan nga mapalambo ang serbisyo publiko ug mapahapsay ang dagan sa transportasyon sa tibuok distrito.