1,100 ka pamilya sa Loay, nakadawat og rice subsidy gikan sa nasudnong pangagamhanan

| By : Jomer Pequit

Nakapahimulos ang kinatibuk-ang 1,100 ka pamilya sa lungsod sa Loay sa gipahigayon nga distribusyon sa Rice Subsidy Program karong adlawa Mayo 19, 2026. Ubos sa maong programa nga gigasahan og pundo sa Nasudnong Pangagamhanan pinaagi sa Local Government Support Fund – Financial Assistance to Local Government Units (LGSF-FALGU), ang matag kwalipikadong pamilya nakadawat og tag-10 ka kilo nga bugas isip dinalian nga tabang sa ilang panginahanglanon.

Aron masiguro ang hapsay ug organisadong pag-apod-apod sa maong ayuda nga nahiuyon sa Strategic Governance Roadmap, nagtinabangay ang Kagamhanang Probinsiyal sa Bohol (PGBh) pinaagi sa Office of the Provincial Social Welfare and Development (OPSWD), ug ang Kagamhanang Lokal sa Loay. Gitataw sa PGBh ang dakong kamahinungdanon sa nagpadayon nga alyansa ug pagtinabangay sa mga nasyonal nga ahensya, lokal nga kagamhanan, ug kabarangayan aron mas mapalig-on ang mga programa sa kaayohang sosyal ug mga support system sa komunidad sa tibuok Bohol Island Geopark. / Source : PGBH