SA TAGBILARAN ; MGA KONSUMIDOR NGA MYEMBRO SA 4PS, NON-4PS UG SENIOR CITIZENS, MAKAPAHIMULOS NA SA DISKWENTO UG LIBRENG KORYENTE SA BOHOL LIGHT

| By : Jomer Pequit, DYTR NEWS

Gipahibalo sa Bohol Light kagahapon atol sa “Barangayan” ang mas gipalapdan nga diskwento ug libreng koryente alang sa mga benepisyaryo sa Pantawid Pamilyang Pilipino Program (4Ps), mga pamilyang ubos ang kita (Non-4Ps), ug mga Senior Citizens nga konsumidor sa Bohol Light sa Dakbayan.

Kini subay sa opisyal nga pagpatuman sa Energy Regulatory Commission (ERC), Department of Energy (DOE), ug Department of Social Welfare and Development (DSWD) sa Joint Resolution No. 01, Series of 2026, nga nag-amendar sa Lifeline Rate Subsidy Program ug sa Magna Carta for Residential Electricity Consumers aron magaan-gaan ang bayranan sa koryente sa mga kabos nga panimalay.

Ubos sa bag-ong patakaran sa Lifeline Discount karong tuiga, hingpit nang libre o adunay 100% discount ang mga konsumidor nga mogamit lamang og 0 hangtod 50 kWh nga koryente sa usa ka bulan.

Samtang, kadtong makakonsumo og 51 hangtod 70 kWh makadawat og 35% nga diskwento, ug aduna usab 20% nga diskwento para sa mga mogamit og 71 hangtod 100 kWh.

Alang sa mga pamilyang Non-4Ps, kinahanglang ubos sa ₱12,000 ang kinatibuk-ang kita sa pamilya matag bulan aron mahimong kwalipikado sa programa.

Gawas niini, nagtanyag usab ang Bohol Light og 5% nga Senior Citizen Discount sa tibuok bayranan sa koryente, basta dili molapas sa 100 kWh ang ilang binuwan nga konsumo.

Aron makuha ang maong mga pribilehiyo, gipahinumdoman sa Bohol Light ang mga aplikante ug mga konsumidor sa pagsumite sa mga gikinahanglan nga dokumento sa opisina.

Alang sa mga Senior Citizens, kinahanglan ang pirmadong application form,labing bag-o nga bill sa koryente, valid government ID nga adunay pirma ug adres, ug sertipikasyon gikan sa barangay nga gipirmahan usab sa duha ka silingan isip mga saksi.

Alang sa mga kwalipikado sa Lifeline Discount nga ubos sa Non-4Ps sector, kinahanglang isumite ang Lifeline Rate application form, labing uban nga bill sa koryente, valid ID, Certificate of Indigency gikan sa barangay, ug sertipikasyon gikan sa Local Social Welfare Development Office (LSWDO) nga gi-issue sulod sa unom ka bulan nga nagpamatuod nga ubos sila sa threshold income.

Samtang alang sa mga 4Ps beneficiaries, mas simple ang rekisitos diin kinahanglan lamang ang application form, 4Ps ID dungan sa laing valid government ID, ug ang labing bag-o nga bill sa koryente aron hingpit nga maproseso ang ilang diskwento.