Kapin ₱2-M nga pahalipay, gihatag ngadto sa mga LGUs ug barangay nga nag-una sa Solid Waste Management sa Bohol

| By : Jomer Pequit, DyTR News

Ganti ug pasidungog nga mokabat ngadto sa kapin ₱2-milyones ang gipang-apod-apod ngadto sa mga nagkalain-laing kalungsuran ug kabarangayan sa lalawigan sa Bohol nga mipakita og maayong implementasyon sa solid waste management. Ang maong awarding ceremony gipangulohan sa kagamhanang probinsiyal pinaagi sa pagdumala sa Bohol Provincial Environment Management Office (BPEMO) ubos ni Head Jovencia Ganub, kauban sila si Atty. Jeffrey Escaso sa Pollution Control Section, ug Leonillo Lafuente.

Sa kategoriya sa Top 10 Best Performing LGUs in Ecological Solid Waste Management (2024-2025), nakuha sa LGU Balilihan ang unang dapit diin nadawat niini ang ₱300,000. Gisundan kini sa LGU Dauis (2nd, ₱275,000), LGU Clarin (3rd, ₱250,000), LGU Trinidad (4th, ₱225,000), LGU Loay (5th, ₱200,000), LGU Jagna (6th, ₱175,000), LGU Sikatuna (7th, ₱160,000), LGU Cortes (8th, ₱140,000), LGU Pilar (9th, ₱120,000), ug LGU San Miguel (10th, ₱100,000).

Wala usab magpalupig ang lebel sa kabarangayan diin nakadawat og tag-₱15,000 ang mga pinasidunggang barangay tungod sa ilang espesyal nga kontribusyon sa kalikopan. Lakip sa mga giila mao ang Rosario, Cortes (Environmental Governance); Cogon, Balilihan (Documentation); San Vicente, Trinidad (Composting); Bitaogan, Antequera (Recycling); Tangohay, Dimiao (Best Managed MRF); Yanangan, Loay (Best Committee); Tapon, Ubay (Cleanest Coastal-Urban); Limocon Ilaud, Dimiao (Best IEC); Salog, Getafe (Best Legislation); ug Nueva Esperanza, Bien Unido alang sa maayong pagpatuman sa Garbage and Garbage Fee Collection. Ang maong kalihokan nagtinguha nga mas dasigon pa ang mga lokal nga kagamhanan sa pag-atiman sa kalikopan alang sa mas limpyo nga probinsya.