16 ka bag-ong inahan sa Ubay, nakadawat og maternity kit isip birthday treat ni Cong. Van-Van Aumentado

| By : Jomer Pequit, DyTR News

Gipahibaw ni Congresswoman Maria Vanessa “Van-Van” Aumentado sa ikaduhang distrito sa Bohol ang pag-apod-apod sa unang batch sa iyang personal nga regalo ngadto sa 16 ka mga bag-ong nanganak nga inahan sa Don Emilio Del Valle Memorial Hospital (DEDVMH) sa lungsod sa Ubay. Ang maong mga benepisyaryo naglakip sa mga inahan sa napulo ka bag-ong natawo nga batang lalaki ug unom ka batang babaye, kinsa malipayong nakadawat sa libreng maternity kit gikan sa kongresista.

Ang matag maternity kit naglangkob sa usa ka stroller, tulo ka buok nga onesies, mga unlan, diaper, wipes, ug grooming kit. Ang maong ayuda gikan sa personal nga pundo ni Congresswoman Van-van Cadorna Aumentado ug nagsilbing dinalian nga birthday treat alang sa pagsaulog sa iyang ika-45 nga adlawng natawhan karong umaabot nga Mayo 21, 2026.

Dako usab ang pasalamat sa kongresista ngadto sa pamunuan ug mga empleyado sa DEDVMH tungod sa giandam nga mga buwak, meryenda, ug sa tabang nga gipadapat sa ilang mga kawani aron masiguro ang hapsay nga pag-apod-apod sa mga regalo. Gidayeg usab niini ang tibuok ospital tungod sa padayon ug maayong serbisyo nga gihatag ngadto sa mga pasyenteng Bol-anon.