Kagamhanang Probinsyal sa Bohol, Molusad og P196-M Rice Subsidy Taliwala sa Krisis

by JOMER PEQUIT
​
Gipalihok na sa Kagamhanang Probinsyal sa Bohol ubos sa pamunoan ni Governor Erico Aris Aumentado ang makinarya niini alang sa paspas nga pag-apod-apod sa bugas ubos sa rice subsidy program, isip taming sa mga Bol-anon batok sa nagkagrabe nga epekto sa krisis sa ekonomiya ug El Niño nga nasinati karon sa tibuok lalawigan.

​Ang maong programa gipondohan sa ₱196 milyones gikan sa Local Government Support Fund–Financial Assistance (LGSF-FA) pinaagi sa nasudnong inisyatiba nga Bagong Pilipinas Rice Program.

Gawas niining dako nga kantidad gikan sa kaulohan, ang probinsya nangandam na usab og dugang pundo aron masiguro nga walay pamilyang mabilin ug mas daghan pa ang makadawat sa maong ayuda.

"Kini nga pondo gikan sa P196 million nga LGSF-FA, ubos sa Bagong Pilipinas Rice Program, nga atong nadawat gikan sa National Government. Nag-andam usab kita og dugang pondo aron mas daghan pa ang atong matabangan." butyag sa gobernador.
​
​Gihatagan og prayoridad sa kagamhanan ang sektor sa transportasyon ug ang mga mananagat, duha sa mga pundok nga labing daling maigo sa bisan unsang pagtay-og sa ekonomiya.

"Gihatagan nato og prayoridad ang atong transport sector ug mga mananagat nga direktang naapektuhan sa krisis, base sa listahan nga maggikan sa atong mga LGUs."dugang ni Aumentado.

Ang listahan sa mga benepisyaryo pagasutaon pag-ayo pinaagi sa mga Local Government Units (LGUs) aron masiguro nga ang bugas mahatag sa mga pamilyang labing nanginahanglan. Target sa maong programa ang liboan ka household matag hugna o tranche.

"Target nato ang libo-libong pamilya matag tranche, diin matag benepisyaryo makadawat og bugas isip tabang sa ilang adlaw-adlaw nga panginahanglan." katapusang pamahayag sa gobernador.

​Kini nga lakang gihimo sa kagamhanan samtang ang Bohol kasamtangang nakigbugno sa ​Inflation ug Oil Price Hikes. Ang padayong pagsaka sa presyo sa petrolyo nagduslit og "chain reaction" diin misaka usab ang presyo sa mga palaliton ug pletehan, nga nagdugang sa palas-anon sa inadlaw-adlaw nga panginahanglan sa matag Bol-anon.