GEOLOGIST ; DILI DAPAT DIHA IBUTANG ANG TAYTAYAN, ENVIRONMENTAL STUDY GIKWESTYON!

Dili unta angay nga gipatindog sa maong dapit ang Bato Bridge nga nahimutang sa Barangay Cabawan. Kini ang gipahayag sa usa ka geologist nga nakabase sa Bohol niadtong Hunyo 18, dungan sa pagkuwestiyon kon ngano nga diha gihapon kini gitukod bisan pa man sa kakusog sa sulog sa tubig sa maong dapit.

Base sa pakisusi nga gihimo usab sa PDRRMO, makita na nga anam-anam na nga nangaguba ang mga kalsada ug mga babag (barriers) sa maong dapit tungod sa natural nga kondisyon sa yuta ug tubig.

Gibutyag ni Provincial Disaster Risk Reduction and Management Office (PDRRMO) Head, Anthony Damalerio, sa usa ka interview sa DYTR News, nga duna nay mga divers nga misalom sa ilawom aron susihon ang sitwasyon.

Subay sa ilang nakita, nagsugod na gayod sa pagkahunlak ang bahin sa kalsada duol sa Bato Bridge. Sa inisyal nga assessment, "Soil Subsidence" o ang natural nga pagkahulpa sa yuta ang nag-unang hinungdan sa kadaot, ug dili ang istruktura sa engineering.

Kini gipaluyohan usab sa pamahayag sa contractor ug provincial engineer nga nagkanayon nga lig-on ug walay depekto ang mismong tulay, apan ang dapit sa "approach" o ang isigka-tumoy sa kalsada nga nagsumpay sa tulay ang grabeng nadaot.

Gikumpirma ni Damalerio nga niabot na sa tulo ka metros ang gitas-on sa maong pag-collapse o pagkahunlak sa kalsada.

Sumala sa engineer nga nahinabi sa DYTR News, duna nay gipangtaod nga duha ka sheet piles nga tag-12 feet ang gitas-on isip pagpugong, apan humok gihapon ang yuta tungod sa kakusog sa sulog sa tubig, ilabi na kon mosaka ang taob.

Gidugang ni Damalerio nga tungod walay hunong ang paglihok ug current sa tubig, segurado gayod nga molihok ang maong approach.

Tungod sa kalisod sa maong problema, dako ug dako gayod nga pundo ang gikinahanglan aron mapangitaan kini og solusyon. Apan bisan pa man og mahuman ang maong pag-ayo, niingun ang geologist nga sa paglabay sa katuigan, lagmit mobalik ra gihapon kini sa pagkahunlak tungod sa kinaiyahan sa dapit.

Ubos niini, seryosong gikuwestiyon sa geologist kon hain na ang gihimo nga Environmental Study sa wala pa sugdi ang maong Bato Bridge Project.

Base sa Project Transparency Board, ang maong proyekto nagkantidad og ₱29 milyones.

Sa pagkakaron, gihikay na sa PDRRMO ang ilang opisyal nga report aron itunol ngadto kang Gobernador Aris Aumentado alang sa dugang mga direktiba ug dinaliang kamanduan kalabot sa nagkaanam ka delikado nga sitwasyon sa tulay.