‘DILI DIHA-DIHA MOKUNHOD’: DOE NAGPAHIMANGNO NGA MAGPABILIN PANG TAAS ANG PRESYO SA LANA BISAN PA OG MAHUMAN ANG GUBAT

by JOMER PEQUIT

Gipahimangnoan sa Department of Energy (DOE) ang publiko nga ayaw pagdahom og paspas nga pag-ubos sa presyo sa lana sa nasod bisan pa man og matapos ang gubat sa Middle East. Sumala ni Energy Secretary Sharon Garin, ang dakong kadaut sa mga imprastraktura sa enerhiya sa maong rehiyon maoy nag-unang babag sa dinaliang pag-stabilize sa suplay ug presyo sa petrolyo.

Sa usa ka press briefing karong adlawa, Abril 7, 2026, gipasabot ni Garin nga dili ingon niana kasayon ang pagpabalik sa normal nga operasyon sa mga oil refineries ug mga pantalan nga nangaguba tungod sa mga pagpamasabut ug drone strikes sa Iran ug uban pang dapit sa Gulf region. Matud pa niya, dako ang epekto niini sa tibuok kalibutan nga merkado, ilabi na nga ang Pilipinas nag-import og dul-an sa 98% sa iyang panginahanglanon sa lana gikan sa gawas sa nasod.

“I do not expect (prices) to go down as fast as it went up,” (Wala ko magdahom nga mokunhod ang presyo sa lana ingon kapaspas sa pagsaka niini,) matud ni Garin ngadto sa mga tigbalita.

Gidugang sa kalihim nga bisan og adunay mga inisyatibo sa "risk management" sama sa pagtugot sa luwas nga agianan sa mga barko sa Strait of Hormuz, dili kini awtomatikong magpasabot og barato nga gasolina. Base sa taho sa DOE ug mga industry sources karong semanaha, ang presyo sa diesel gilauman pa gani nga mosaka ngadto sa ₱170 matag litro, samtang ang gasolina mahimong moabot sa ₱110 hangtod ₱120 matag litro tungod sa nagpadayong tensyon.

Giawhag sa kagamhanan ang katawhan sa pagdaginot sa paggamit sa enerhiya samtang gipailalom pa ang nasod sa State of National Energy Emergency ubos sa Executive Order No. 110. Sa pagkakaron, padayon ang paningkamot sa Philippine National Oil Company (PNOC) sa pag-angkat og dugang suplay aron masiguro nga dili mahutdan og stock ang nasod samtang nagpaabot sa paghupay sa krisis sa kalibutan.