BOHOL NANGANDAM SA VISA-FREE ENTRY PROGRAM; ABOITIZ INFRACAPITAL MIPAKITA’G SUPORTA KANG GOV. AUMENTADO

| By Jomer Pequit

Gilauman nga mas mosaka pa ang ekonomiya ug turismo sa Bohol human pormal nga gilihok sa kagamhanang probinsiyal ang aplikasyon aron malakip ang lalawigan sa "visa-free entry program" alang sa mga turistang Intsik. Isip pagpakita og lig-on nga suporta niini nga tinguha, personal nga mibisita ang mga kadagkoan sa Aboitiz InfraCapital, Inc. nga gipangulohan ni Raymund Peter Esperat, Aldwin Uy, Christopher Camba, ug Vince Tan ngadto kang Gobernador Erico Aris Aumentado sa Kapitolyo niadtong Mayo 15, 2026. Ang panagtigom nagpunting sa pagsumite sa opisyal nga hangyo ngadto kang Department of Foreign Affairs (DFA) Secretary Ma. Theresa Lazaro aron tugutan ang mga Chinese tourists nga makasulod sa probinsya nga dili na kinahanglan og visa.

Tinguha ni Gobernador Aumentado nga makasubay ang Bohol sa kaayohan nga natagamtaman na karon sa Sugbo ug Manila, diin gisugdan ang 14-day visa-free entry para sa mga magpapatigayon ug bisita gikan sa China niadtong Enero ning tuiga. Matod sa gobernador, dako ang matabang niini nga programa aron madasig ang mga langyaw nga mosakay sa mga direktang biyahe padulong sa Bohol Panglao International Airport (BPIA). Gawas nga mopalambo kini sa lokal nga turismo, gilauman usab nga makadani kini og dugang mga investors nga maghatag og mas daghang trabaho alang sa mga Bol-anon.

Sa kasamtangan, gipaspasan na ang pagpangandam alang niini nga inisyatiba uban ang tabang gikan sa Department of Tourism (DOT), Sangguniang Panlalawigan, League of Municipalities of the Philippines (LMP), ug mga stakeholders sa turismo. Base sa datus, ang China mao ang ikaduha sa labing dako nga tinubdan sa mga turista sa Bohol, diin miabot ngadto sa 146,000 ka mga Intsik ang mibisita gikan sa tuig 2022 hangtod 2025, gawas pa sa malampusong pagdumala sa mga chartered flights gikan sa Chengdu karong tuiga. Salig ang administrasyong Aumentado nga tungod sa dungog sa Bohol isip usa ka UNESCO Global Geopark ug ang BPIA isip labing unang eco-airport sa nasod, dako ang tsansa nga maaprubahan sa DFA ug Bureau of Immigration (BI) ang maong hangyo.