AYUDA NGA BUGAS ALANG SA KABOS NGA BOL-ANON, GISUGDAN NA’G APOD-APOD SA KADAKUAN SA KAPITOLYO

| By : Jomer Pequit

Gisugdan na sa Kagamhanang Probinsyal sa Bohol, ubos sa administrasyon ni Gobernador Aris Aumentado, ang lapad nga pagpang-apod-apod sa tag-10 ka kilong bugas ngadto sa mga labing nanginahanglan nga pamilya sa kalungsoran. Ang maong "Rice Subsidy Distribution" pormal nga mianhi sa lungsod sa Panglao niadtong Mayo 14, 2026, diin 2,550 ka benepisyaryo ang nakapahimulos, gisundan sa Bien Unido nga adunay 2,000 ka pamilya, ug Sierra Bullones niadtong Mayo 15 nga nakaserbisyo og 1,595 ka benepisyaryo.

Ang tibuok operasyon gidumala sa Office of the Provincial Social Welfare and Development (OPSWD) ug Office of the Provincial Agriculturist (OPA) pinasubay sa listahan nga gisumite sa matag Local Government Unit (LGU).

Ang pondo nga gigamit sa maong programa nagkantidad og ₱196-Milyon nga gikan sa nasudnong panudlanan pinaagi sa Local Government Support Fund (LGSF-FA to LGU). Base sa DILG-DBM Joint Circular No. 1 series of 2026, kinahanglang tagaan og tabang ang 25 porsiyento sa tibuok populasyon nga giila nga mga indigent o kadtong labing apektado sa krisis sa ekonomiya. Sa datus sa PSA niadtong 2024, gibana-bana nga moabot sa 86,142 ka pamilya ang target nga makadawat niini sa tibuok probinsya. Lakip sa mga gihatagan og prayoridad mao ang mga drayber, mangingisda, persons with disabilities (PWDs), solo parents, senior citizens, mga pamilyang ubos sa 4Ps, ug mga minimum wage earners. Aron masiguro nga makiangayon ang distribusyon, giklaro sa kapitolyo nga dili na mahimong makadawat kadtong nakakuha na og ayuda gikan sa DSWD, BFAR, ug uban pang nasyonal nga ahensya.

Aron makompleto ang upat ka tranche sa pagpanghatag, nagpunting usab ang probinsya og dugang ₱11-milyones, samtang ang mga LGUs naggahin og tag-₱5 Milyones gikan sa ayuda sa Opisina sa Presidente para sa mga pamilyang angayan apan wala malakip sa unang listahan. Nanawagan sila OPSWD Head Carmelita Tecson ug Provincial Administrator Asteria Caberte sa publiko nga magdala gayod og saktong Identification Document (ID) aron hapsay ug malikayan ang kagubot sa mga site. Usa sa mga nakapahimulos mao si Elena Gonzales, usa ka biyuda gikan sa Bien Unido nga nagbuhi og siyam ka anak ug walo ka apo, kinsa nagpasalamat og dako kay makapahuway una siya sa huna-huna sa pagpalit og bugas. Gilauman nga magpadayon kini nga distribusyon hangtod sa Hunyo 10 ning tuiga, isip kabahin sa Strategic Change Agenda sa Bohol nga kunhuran ang kapobrehon sa maong UNESCO Global Geopark.