413 KA INDIBIDWAL, NADAKPAN UG USA KA ADLAW NGA OPERASYON SA BOHOL PPO

| by Jomer Pequit

Mikabat sa 413 ka mga indibidwal ang malampusong nabadlong, nadakpan, ug na-rescue sa Bohol Police Provincial Office (BPPO) sulod lamang sa usa ka adlaw nga operasyon ubos sa programang Safer Cities Initiative. Ang maong lapad nga operasyon gipahigayon pinaagi sa hiniusang pwersa sa kapulisan sa nagkadaiyang dapit sa probinsya ubos sa lig-on ug seryosong pagdumala ni Provincial Director PCOL Patricio C. Degay Jr., isip kabahin sa ilang tinguha nga masiguro ang kahapsay, kalinaw, ug kaluwasan sa tibuok Bohol.

Subay sa opisyal nga datus nga gipagawas sa BPPO, ang labing dako nga gidaghanon sa mga violator naggikan sa City/Municipal Traffic Ordinance nga miabot ngadto sa 214 ka mga indibidwal. Gisundan kini sa 88 ka mga menor de edad nga na-rescue human nakalapas sa curfew hours, samtang 34 naman ang nadakpan tungod sa pag-inom sa pampublikong dapit (drinking in public places).

Dugang pa niini, nakatala usab ang kapulisan og 12 ka violators sa pagsigarilyo sa pampublikong dapit (smoking in public places), unom (6) ka indibidwal nga nagsuroy-suroy nga walay senina o shirtless, ug 59 pa ka mga indibidwal ang nabadlong tungod sa paglapas sa uban pang lokal nga ordinansa sa ilang tagsa-tagsa ka lungsod.

Matod sa pamunoan sa Bohol PPO, ang maong lakang nagpamatuod lamang sa ilang seryosong tinguha nga ipatigbabaw ang disiplina sa komunidad pinaagi sa istriktong pagpatuman sa balaod. Gidugang sa ahensya nga kini usa sa labing epektibong pamaagi aron mapugngan ang krimen ug mapadayon ang kahapsay sa mga kadalanan, uban sa panawagan alang sa padayong kooperasyon sa matag law-abiding Boholano alang sa usa ka luwas ug hapsay nga probinsya.