Task Force batok Hoarding ug Profiteering, Gisugyot sa Tagbilaran City Council

by JOMER PEQUIT

Gisugyot ni Vice Mayor Adam Jala ang dinaliang pagporma og usa ka dedikadong task force nga maoy hugot nga mo-monitor sa presyo sa lana ug uban pang batakang palaliton sa dakbayan sa Tagbilaran taliwala sa nasinati nga hulga sa pagsaka sa presyo sa merkado.

Atol sa session sa SP Tagbilaran karong adlawa Marso 24, gipadayag ni Jala ang kabalaka nga basin mapahimuslan ang sitwasyon pinaagi sa profiteering ug hoarding. Sumala sa bise mayor, kinahanglan nga malakip sa maong task force ang mga otoridad sa balaod aron masiguro ang pagsilot sa mga mapahimuslanon nga negosyante.

Gihisgutan usab niya ang pagpahimutang og hotlines alang sa mga reklamo sa katawhan ug ang posibleng paglimit sa pagpalit og gasolina (purchase limit) aron malikayan ang pag-panic sa publiko ug ang pagtipig og sobra-sobra nga lana.

Sa iyang bahin, gipasalig ni City Administrator Alvin Acuzar, kinsa maoy nangulo sa City Price Monitoring Council (CPMC), nga ilang palapdan ang komposisyon sa konseho aron maapil ang dugang mga stakeholders gikan sa habig sa mga suppliers. Matud ni Acuzar, nakig-alayon na usab sila sa Department of Energy (DOE) nga naghatag na og technical guidelines ug dashboard alang sa mas paspas nga pag-monitor sa presyo diha sa mga gasoline stations. Dugang pa niya, gihimo na ang regular nga pag-inspeksyon sa mga personahe sa dakbayan aron mabantayan ang lihok sa presyo sa mga baligya.

Giduso usab ni Jala ang pagpanday og usa ka ordinansa nga maghatag og ngipon sa dakbayan sa pagpahamtang og bug-at nga silot batok sa mga mapamatud-an nga nagtago og baligya o nagpasobra sa presyo.

Gitataw sa mga opisyal nga ang maong lakang gihimo dili lang aron protektahan ang mga konsumedor, kundi aron usab maseguro nga dunay patas nga koordinasyon tali sa gobyerno ug sa mga negosyante sa dakbayan.