Plete sa Tricycle sa Tagbilaran Mosaka Na Taliwala sa P100+ Presyo sa Gasolina

by DAVE RESPONTE

Gikonpirmar ni City Councilor Leonides “Edi” Borja nga nadawat na sa iyang committee ang referral sa hangyo sa mga Tricycle Operators and Drivers Associations (TODA) sa Tagbilaran alang sa usbaw sa pletehan, tungod sa padayon nga pagsaka sa presyo sa produktong petrolyo nga giugnay sa krisis sa Middle East.

Sumala ni Borja, ang maong hangyo opisyal nang giendorso ni Tagbilaran City Mayor Jane Yap ngadto sa Sangguniang Panlungsod isip usa ka formal nga komunikasyon.

Ang maong sulat girefer sa Committee on Public Utilities and Franchises nga gipangulohan ni Borja atol sa regular session nga gipangulohan ni Vice Mayor Adam Relson Jala kagahapon, Marso 24.

Matod pa ni Borja, giila nila ang pagka-urgent sa isyu, hinungdan nga magpahigayon dayon sila og committee meeting karong Huwebes, Marso 26, aron hisgutan ang maong hangyo.

Gitarget usab sa committee ang pagpahigayon og public hearing karong Lunes, Marso 30, 2026, aron madungog ang panig sa TODA ug sa publiko.

Aminado si Borja nga posibleng adunay adjustment sa pletehan sa tricycle, ilabi na nga ang presyo sa gasolina sa merkado miabot na sa kapin ₱100 matag litro.

Ang mga TODA sa Tagbilaran nangayo og P5 nga usbaw sa pletehan matod ni Borja.