Mt. Sagungan sa Duero Gilusad isip Eco-Tourism Hub; Mayor Taculad: “Buko-Buko sa Anay” Magdala og Bag-ong Kauswagan

by DAVE RESPONTE

Gipahayag ni Duero Mayor Al Taculad ang kamahinungdanon sa bag-ong eco-tourism site nga Mt. Sagungan o “Buko-Buko sa Anay” sa Barangay Danao, nga gilunsad isip bag-ong turismo gateway sa lungsod.

Matod ni Taculad atol sa interbyu sa mga sakop sa Bohol media nga ang proyekto dili lamang alang sa pagdani og turista kondili para usab sa pagpreserbar sa kinaiyahan ug pagpalig-on sa partisipasyon sa lokal nga komunidad.

Ang Mt. Sagungan nagtanyag og talagsaong talan-awon sa pangpang, virgin forest, ug kabukiran nga angayan sa trekking ug nature adventure, nga gilauman makadani og dugang bisita sa Duero.

Gibutyag usab ni Taculad nga nagplano ang lokal nga kagamhanan sa pagbutang og environment-friendly nga mga pasilidad aron mas mapauswag pa ang lugar samtang ginapadayon ang sustainability.

Gihingusgan sa mayor ang suporta sa sektor sa turismo aron mapalambo ang ekonomiya sa lungsod ug mahimong mas “competitive” ang Duero isip usa sa emerging tourist destinations sa probinsya sa Bohol.

Mipasalamat usab si Taculad sa mga lokal nga opisyal ug partners nga nagtinabangay aron mapadayag ang potensyal sa Mt. Sagungan isip bag-ong eco-tourism attraction.

Subay niini, nagduso na ang Office of the Mayor og mga sugyot alang sa mga guidelines ug rates para mahimo na og ordinansa sa mga sakop sa Sangguniang Bayan sa lungsod.