Mayor Meriam Sumaylo Nisakay Multicab, Gipadayag ang Kahimtang sa Pasahero ug Driver Taliwa sa Pagsaka sa Presyo sa Gasolina

by DAVE RESPONTE

Nisakay og multicab si Dauis Mayor Marietta Tocmo Sumaylo sayo sa buntag, Miyerkules aron makadaginot sa gasolina ug makig-istorya direkta sa mga pasahero, taliwala sa pagsaka sa presyo sa krudo tungod sa tensyon sa Middle East.

Sa iyang social media post alas 6:50 sa buntag, giingon sa mayor nga gipili niyang mag-commute aron masabtan ang kahimtang sa mga ordinaryong pasahero ug driver.

Atol sa biyahe, mitumaw ang nagkadaiyang kabalaka gikan sa mga pasahero. Usa kanila nangutana bahin sa “free ride” program sa lungsod, apan gipatin-aw sa mayor nga wala kini karon tungod kay gigamit ang sakyanan sa serbisyo sa patay.

May lain usab nga nangutana kon adunay pagsaka sa plete, apan giingon ni Sumaylo nga wala’y opisyal nga mando nga magpataas sa pasahe. Bisan pa niini, usa ka pasahero mitug-an nga boluntaryo siyang midugang sa iyang bayad gikan ₱20 ngadto ₱25 aron matabangan ang driver sa mahal nga gasolina.

Nagpasalamat ang mayor sa maong lihok ug nag-ingon nga importante ang pagsinabtanay sa tanan atol sa kasamtangang krisis.

Samtang, usa ka pasahero nga bag-ong abot gikan sa Dubai mitug-an nga makuyawan sila matag gabii tungod sa sunod-sunod nga pagbuto didto, nga nagpakita sa kabug-at sa sitwasyon sa gawas sa nasud.

Tubag ni Sumaylo, mapasalamaton ang mga Pilipino kay malinawon ang kahimtang sa nasud ug giawhag ang tanan sa pag-ampo alang sa dali nga pagsulbad sa krisis sa kalibutan.

Ang kasinatian sa mayor sa pag-commute nagpakita sa direktang epekto sa internasyonal nga tensyon sa lokal nga komunidad, ilabi na sa transportasyon ug adlaw-adlaw nga gastohan.