Mayor Jane Yap Nagtukod og Crisis Management Committee Taliwala sa State of National Energy Emergency

by JOMER PEQUIT

Agig tubag sa Executive Order No. 110 sa nasudnong kagamhanan nga nagdeklarar og State of National Energy Emergency, niluwat si Mayor Jane Yap og usa ka City Executive Order alang sa pagmugna sa Tagbilaran City Crisis Management Committee (TCCMC). Kini nga lakang nagtumong sa usa ka "whole-of-city response" aron maseguro ang koordinasyon sa tanang sektor sa dakbayan atubangan sa krisis sa enerhiya ug lana nga nakaapekto sa tibuok nasod.

​Nanawagan ang Mayor sa pribadong sektor, mga tunghaan, ug uban pang institusyon nga makigtambayayong sa kagamhanan aron maseguro ang energy efficiency ug ang padayong paghatag og serbisyo sa publiko.

Gipahayag ni Mayor Yap nga prayoridad sa TCCMC ang paghatag og suporta sa mga daling maigo sa krisis, sama sa mga mangingisda, mag-uuma, gagmayng negosyo (SMEs), ug kadtong mga minimum wage earners, aron maprotektahan ang ilang panginabuhian ug ang lokal nga ekonomiya.

​Gipasiugdahan sab ni Mayor Yap ang kampanya sa pagdaginot sa kuryente ug ang maalamong paggamit sa enerhiya, sanglit dako ang epekto niini sa transportasyon ug suplay sa pagkaon.

Matod pa sa Mayor, lahi kini nga hagit itandi sa pandemya sa COVID-19 tungod kay hapit tanang aspeto sa inadlaw-adlaw nga pagpuyo nagdepende sa enerhiya. Nanawagan siya og disiplina, kooperasyon, ug dinaliang aksyon gikan sa matag Tagbilaranon aron dungan nga masulbad ang maong krisis.