Marcos, nagdeklarar og State of National Energy Emergency; 'UPLIFT' framework gilusad

by JOMER PEQUIT

Gideklarar ni Presidente Ferdinand Marcos Jr. niining adlawa, Martes, Marso 24, 2026, ang state of national energy emergency sa tibuok nasod tungod sa nagpadayong kagubot sa Middle East nga naghulga sa seguridad ug kalig-on sa suplay sa kuryente ug lana sa Pilipinas. Sumala sa Presidente, gikinahanglan kining dinalian nga lakang aron mapanalipdan ang ekonomiya ug ang publiko gikan sa posibleng kakuwang sa enerhiya ug ang paspas nga pagsaka sa presyo niini.

Dungan niini, gi-otorisar usab ni Marcos ang pagpatuman sa Unified Package for Livelihoods, Industry, Food, and Transport o UPLIFT isip opisyal nga "whole-of-government response framework." Kini nga programa maoy magsilbing koordinadong pamaagi sa tanang ahensya sa gobyerno aron maseguro nga dili maputol ang serbisyo sa transportasyon, mapabilin ang igong suplay sa pagkaon, ug masuportahan ang mga industriya ug panginabuhian sa mga Pilipino taliwala sa krisis sa enerhiya.