Gisusi sa Tagbilaran SP ang Kaluwasan sa Pagkaon Gibaligya Duol sa mga Tunghaan

by DAVE RESPONTE

Gituki sa Sangguniang Panlungsod sa Tagbilaran ang kahimtang sa kalimpyo ug kaluwasan sa pagkaon nga gibaligya sa mga ambulant vendor gawas sa mga tunghaan, usa ka semana human sa pagbukas sa klase.

Gidala ni Konsehal Fausto “Bebot” Budlong, chairman sa Committee on Peace, Order and Public Safety, ang maong isyu ngadto sa konseho human sa iyang nadawat nga mga report bahin sa posibleng kakulang sa sanitasyon ug food safety sa mga pagkaong gibaligya duol sa mga eskwelahan sa dakbayan.

Gisuportahan sa ubang mga miyembro sa konseho ang kabalaka ni Budlong, diin ilang gihisgutan ang posibleng peligro sa panglawas sa mga estudyante nga mahimong mabiktima sa kontaminado o dili luwas nga pagkaon.

Niatubang sa konseho si City Health Officer Dr. Jiea Pondoc ug mga sanitary inspector aron ihatag ang kasamtangang kahimtang ug mga rekomendasyon sa pagpalig-on sa pagmonitor ug pagpatuman sa mga lagda sa food safety sa palibot sa mga tunghaan.

Kabahin kini sa paningkamot sa dakbayan sa pagpanalipod sa kaayohan ug panglawas sa mga magtutungha samtang misugod ang bag-ong tuig sa pagtungha.

Gilauman nga maghimo ang mga opisyal sa dakbayan og mga lakang ug regulasyon aron maseguro nga ang mga pagkaong gibaligya duol sa mga tunghaan motuman sa health ug sanitation standards ug malikayan ang mga sakit nga mahimong makuha gikan sa kontaminadong pagkaon.