WARNING [MENTIONING RAPE]

CWC Nagpasidaan: Pakighilawas sa Ubos sa 16 Anyos Giisip nga Pagpanglugos o 'Qualified Rape'

by JOMER PEQUIT

Gipahimangnoan sa Council for the Welfare of Children (CWC) niadtong Lunes ang publiko, ilabi na ang mga hamtong nga kalalakin-an, nga ang pakighilawas sa mga batang babaye nga nag-edad og ubos sa 16 anyos giisip na nga pagpanglugos ubos sa balaod sa Pilipinas. Sumala ni CWC Executive Director Angelo Tapales, base sa na-amendar nga Rape Law, ang 16 anyos mao ang gitakda nga age of consent, busa bisan pa og boluntaryo ang maong buhat, matawag gihapon kini nga "practically rape" o qualified rape tungod sa kalinghod sa pangidaron sa biktima.

Kini nga pasidaan giluwatan sa CWC taliwala sa kabalaka sa nagkataas nga ihap sa pagmabdos sa mga menor de edad sa nasod, diin ang mga hamtong nga lalaki ang giingong sagad responsable niini. Gipasiugda ni Tapales nga ang balaod gidisenyo aron maprotektahan ang mga kabataan gikan sa sexual exploitation, sanglit sa maong edad, dili pa sila hingpit nga makahatag og legal nga pagtugot o desisyon sa ingon niana nga sensitibong buhat. Naglaum ang CWC nga pinaagi niini nga pagpaklaro, mas mapahugtan ang proteksyon sa mga kabataan ug manubag ang mga nakalapas sa katungod sa mga menor de edad.